കൊച്ചി, കോഴിക്കോട് പുറംകടലില് ഉണ്ടായ കപ്പല് ദുരന്തങ്ങളില് കര്ശന നിര്ദേശവുമായി ഹൈക്കോടതി. പരിസ്ഥിതിക്കുണ്ടായ നാശനഷ്ടം പരിശോധിക്കണമെന്ന് ഹൈക്കോടതി നിര്ദേശിച്ചു. കപ്പല് അപകടങ്ങളില് കര്ശന നടപടി വേണം. ഒരു തവണ കര്ശന നടപടി എടുക്കാതിരുന്നാല് അക്കാര്യം ശീലമായി മാറും. പരിസ്ഥിതിക്കുണ്ടാകുന്ന നഷ്ടം സാമ്പത്തിക നഷ്ടമായി കണക്കാക്കണമെന്നും ഹൈക്കോടതി നിര്ദേശിച്ചു. ചീഫ് ജസ്റ്റിസ് നിതിന് ജംദര്, ജസ്റ്റിസ് ബസന്ത് ബാലാജി എന്നിവര് ഉള്പ്പെട്ട ഡിവിഷന് ബെഞ്ചാണ് നിര്ദേശം നല്കിയത്.
നിയമങ്ങളും രാജ്യാന്തര കരാറുകളും പരിശോധിച്ച് നടപടിയെടുക്കണമെന്നും ഹൈക്കോടതി നിര്ദേശം നല്കി. നഷ്ടം കപ്പല് കമ്പനിയില് നിന്ന് തിരിച്ചുപിടിക്കണം. പൊതുഖജനാവിലെ പണം ഉപയോഗിച്ചല്ല നഷ്ടം നികത്തേണ്ടതെന്നും ഹൈക്കോടതി നിര്ദേശിച്ചു. എന്തൊക്കെ നടപടികള് സ്വീകരിച്ചുവെന്ന് കേന്ദ്ര, സംസ്ഥാന സര്ക്കാരുകള് അറിയിക്കണമെന്നും ഹൈക്കോടതി പറഞ്ഞു. സാധ്യമായ എല്ലാ നടപടികളും സ്വീകരിക്കണം. രണ്ട് കപ്പല് അപകടങ്ങളും ഹൈക്കോടതി പൊതുതാത്പര്യ ഹര്ജിയില് പരിഗണിക്കും. പൊതുതാത്പര്യ ഹര്ജി ഭേദഗതി ചെയ്ത് നല്കാന് ഹര്ജിക്കാരന് ഹൈക്കോടതി നിര്ദേശം നല്കി.
