രാജേഷ് എന്ന് പേരുള്ള ഒരാളെയെങ്കിലും പരിചയമില്ലാത്തവരായി ആരും കാണില്ല. അത്രയുമധികം രാജേഷുമാരുണ്ട് നമ്മുടെ നാട്ടിൽ. അങ്ങനെ കുറച്ചധികം രാജേഷുമാർ കണ്ണൂരിൽ ഒന്ന് ഒത്തുകൂടിയപ്പോൾ അത് രാജേഷുമാരുടെ സംസ്ഥാന സമ്മേളനമായി.
ഇവിടെ ആർക്കും പരസ്പരം പരിചയപ്പെടാൻ പേര് ചോദിക്കേണ്ട ആവശ്യമില്ല. എല്ലാം ഒരേ പേരുകാർ. ആദ്യമായല്ല ഒരേ പേരുള്ളവർ ഒരിടത്ത് ഒത്തുകൂടുന്നത്. എങ്കിലും ഒരു കൂട്ടം ആളുകൾ മുഴുവൻ ഒരേ പേരുകാരാവുന്നത് ഇത്തിരി കൗതുകം തന്നെ. രാജസംഗമം എന്ന് പേരിട്ടാണ് രാജേഷുമാർ ഒത്തുകൂടാൻ തീരുമാനിച്ചത്. അടുത്തിടെ വാഹനാപകടത്തിൽ മരിച്ച ചൊറുക്കളയിലെ വിദ്യാർത്ഥി നേദ്യ രാജേഷിന്റെ പേരിലുള്ള നഗറിലാണ് സംഗമം നടന്നത്.
അഞ്ഞൂറോളം രാജേഷുമാരുള്ള വാട്സ്ആപ്പ് കൂട്ടായ്മയിൽ നിന്നും ഇരുന്നൂറോളം രാജേഷുമാർ സംഗമത്തിന് എത്തി. മാങ്ങാട് ഈസ്റ്റ് എൽപി സ്കൂളിലായിരുന്നു ആ രാജസംഗമം. രാജാക്കന്മാരുടെ ഈശൻ എന്നാണ് രാജേഷ് എന്ന പേരിന്റെ അർത്ഥമത്രേ.
ആറു പേരിൽ തുടങ്ങിയ ഗ്രുപ്പ് ഇന്ന് അഞ്ഞൂറിലധികം രാജേഷുമാരുടെ കൂട്ടായ്മയായി മാറി. കേരളത്തിന്റെ വിവിധ ഭാഗങ്ങളിൽ ഉള്ള രാജേഷ്മാരുടെ കുടുംബത്തിന് കൈത്താങ് ആകുക എന്നതാണ് കൂട്ടായ്മയുടെ ലക്ഷ്യം.
