രാഷ്ട്രീയത്തിൽ അങ്കം വെട്ടി ജയിച്ച എം.എൽ.എ വാളും പരിചയുമായി അങ്കത്തട്ടിൽ കയറി . കണ്ണൂർ പൊന്ന്യം ഏഴരക്കണ്ടത്തെ അങ്കത്തട്ടിൽ കൂത്തുപറമ്പ് എം.എൽ.എയും മുൻ മന്ത്രിയുമായ കെ.പി.മോഹനനാണ് കച്ചമുറുക്കി പോരിന് ഇറങ്ങിയത്. ചെറിയ പ്രായത്തിൽ കളരി അഭ്യസിച്ച എം.എൽ.എ പൊന്ന്യത്തങ്കത്തിലെ അഭ്യാസ പ്രകടനങ്ങൾ കണ്ട് ആവേശഭരിതനായാണ് തട്ടിലേക്ക് കയറിയത്.
ഫുട്ബോൾ തട്ടുന്ന മന്ത്രി, കൃഷിക്കാരനായ എം.എൽ.എ, KSRTC ബസ് ഓടിക്കുന്ന മന്ത്രി ഇങ്ങനെ പലതരം അങ്കം നടത്തിയ രാഷ്ട്രീയ നേതാക്കളെ നമ്മൾ കണ്ടതാണ്. എന്നാൽ കച്ചമുറുക്കി, കളരിത്തറയെയും കളരി വിളക്കിനെയും കൈ തൊഴുത് മാറിൽ വെച്ച് വലതുകാൽ മുന്നിൽ വെച്ച് വലിഞ്ഞമർന്ന് തൊട്ട് വന്ദിച്ച് വാളും പരിചയുമായി അങ്കത്തിനിറങ്ങുന്ന എം.എൽ.എയെ അത്ര പരിചിതമാവാൻ ഇടയില്ല. മുൻ കൃഷിമന്ത്രിയും കൂത്തുപറമ്പ് എം.എൽ.എയുമായ കെ.പി.മോഹനനാണ് പൊന്ന്യം ഏഴരക്കണ്ടത്തെ അങ്കത്തട്ടിൽ പോരിന് ഇറങ്ങിയത്.ചെറിയ പ്രായത്തിൽ കളരി അഭ്യസിച്ചിരുന്ന കെ.പി.മോഹനന് അങ്കത്തട്ടിൽ പോര് മുറുകുന്നത് കണ്ടപ്പോൾ പിടിച്ച് നിൽക്കാനായില്ല. നേരെ തട്ടിൽ കയറി.രാഷ്ട്രീയത്തിലെ അങ്കം ജയിച്ചാണ് കെ.പി.മോഹനൻ എം.എൽ.എയും മന്ത്രിയുമായത്. നിയമസഭയിലെ രാഷ്ട്രീയ അങ്കത്തിൻ്റെ കടിഞ്ഞാൺ കയ്യിലുള്ള സ്പീക്കർ എ.എൻ.ഷംസീറിൻ്റെ നേതൃത്വത്തിലാണ് പൊന്ന്യത്തങ്കം സംഘടിപ്പിക്കുന്നത്. എം.എൽ.എയുടെ അങ്കത്തട്ടിലെ അഭ്യാസ പ്രകടനത്തിന് സദസിലിരുന്ന് സ്പീക്കർ കയ്യടിച്ചതോടെ അങ്കം ജയിച്ചതിന് തുല്യം തന്നെ.
