വന്യജീവി ആക്രമണം രൂക്ഷമായിട്ടും നടപടിയെടുക്കുന്നില്ലെന്നാരോപിച്ച് നാളെ വയനാട്ടില് യുഡിഎഫ് ഹര്ത്താല്. രാവിലെ ആറ് മുതല് വൈകീട്ട് ആറുവരെയാണ് ഹര്ത്താല്. പരീക്ഷ, വിവാഹം, പള്ളിക്കുന്ന് തിരുനാള്, മറ്റ് അവശ്യസര്വീസുകള് എന്നിവയെ ഹര്ത്താലില് നിന്നും ഒഴിവാക്കിയിട്ടുണ്ട്.
പ്രതിദിനം ജില്ലയിലെ വിവിധ ഭാഗങ്ങളില് നടക്കുന്ന വന്യജീവി ആക്രമണത്തില് മനുഷ്യജീവനുകള് നഷ്ടപ്പെടുകയാണ്. മരണങ്ങള് റിപ്പോര്ട്ട് ചെയ്യപ്പെട്ടിട്ടും സര്ക്കാര് നടപടി സ്വീകരിക്കാത്തതില് പ്രതിഷേധിച്ചാണ് ഹര്ത്താലെന്ന് യുഡിഎഫ് ജില്ലാ ചെയര്മാന് കെ കെ അഹമ്മദ് ഹാജി, കണ്വീനര് പി ടി ഗോപാലക്കുറുപ്പ് എന്നിവര് അറിയിച്ചു.
രണ്ട് ദിവസത്തിനിടെ രണ്ട് പേരാണ് വയനാട്ടില് വന്യജീവി ആക്രമണത്തില് കൊല്ലപ്പെട്ടത്. ചൊവ്വാഴ്ച രാത്രി അട്ടമലയിലും തിങ്കളാഴ്ച വൈകീട്ട് നൂല്പ്പുഴയിലും ഉണ്ടായ കാട്ടാന ആക്രമണത്തിലാണ് രണ്ടുപേര് കൊല്ലപ്പെട്ടത്. 43 ദിവസത്തിനിടെ നാലു പേര് വന്യജീവി ആക്രമണത്തില് വയനാട്ടില് കൊല്ലപ്പെട്ടിട്ടുണ്ട്.