കണ്ണൂരില് എട്ട് മാസം പ്രായമായ കുഞ്ഞിന് മെഡിക്കല് ഷോപ്പിലെ ഫാര്മസിസ്റ്റുകള് നല്കിയത് മൂന്നിരട്ടി ഡോസ് കൂടിയ മരുന്ന്. മരുന്ന് മാറിക്കഴിച്ച ഗുരുതരാവസ്ഥയിലായ കുട്ടിയെ സ്വകാര്യ ആശുപത്രിയില് പ്രവേശിപ്പിച്ചു. ഡോക്ടര് കൃത്യമായി മരുന്ന് എഴുതിയിട്ടും ഡോസ് കൂടിയ മരുന്ന് എടുത്ത് നല്കിയത് ഫാര്മസിസ്റ്റുകളെന്നാണ് ആരോപണം. കണ്ണൂരിലെ ഖദീജ മെഡിക്കല്സിന്റെ ഭാഗത്തുനിന്നാണ് ഗുരുതരമായ വീഴ്ച ഉണ്ടായത്.
കഴിഞ്ഞ ശനിയാഴ്ചയാണ് പനി ബാധിച്ച കുട്ടിയേയും കൊണ്ട് വീട്ടുകാര് പഴയങ്ങാടിയിലെ ക്ലിനിക്കിലെത്തിയത്. കുഞ്ഞിന് ഡോക്ടേഴ്സ് കാല്പോള് സിറപ്പ് കുറിച്ച് നല്കി. എന്നാല് ഡോക്ടറുടെ ഈ കുറിപ്പടിയുമായെത്തിയ വീട്ടുകാര്ക്ക് ഖദീജ മെഡിക്കല് സ്റ്റോറിലെ ഫാര്മസിസ്റ്റുകള് എടുത്ത് നല്കിയത് കാല്പോള് ഡ്രോപ് ആണ്. മരുന്ന് മാറിയതറിയാതെ ഡോക്ടറുടെ നിര്ദേശം അനുസരിച്ച് മൂന്ന് നേരം വീട്ടുകാര് കുട്ടിയ്ക്ക് മരുന്ന് കൊടുത്തു. പനി അതിവേഗം മാറിയെങ്കിലും കുട്ടിയ്ക്ക് മറ്റ് ബുദ്ധിമുട്ടുകള് തോന്നിയതോടെ വീട്ടുകാര് വീണ്ടും ക്ലിനിക്കിലെത്തി.
ഉടന് കുട്ടിയെ കണ്ണൂരിലെ ആസ്റ്റര്മിംമ്സിലേക്ക് മാറ്റി. നിലവിൽ കുഞ്ഞ് ഗുരുതരാവസ്ഥയില് ചികിത്സയിലാണ്. കുട്ടിയുടെ കരളിനാണ് രോഗം ബാധിച്ചിരിക്കുന്നത്.